Íþróttir | EM í fótbolta | mbl | 10.7.2022 | 17:53 | Uppfært 19:45

Stöngin út í fyrsta leik

Mynd 1 af 11 Stelpurnar klappa fyrir aðdáendum eftir leik. mbl.is/Eggert Jóhannesson

Mynd 2 af 11 Berglind Björg Þorvaldsdóttir fagnar marki sínu hér í dag. AFP

Mynd 3 af 11 Berglind skallar í boltann sem ratar svo í netið. AFP

Mynd 4 af 11 Berglind Björg Þorvaldsdóttir tekur vítaspyrnuna sem Nicky Evrard varði. AFP

Mynd 5 af 11 Nicky Evrard handsamar boltann. AFP

Mynd 6 af 11 AFP

Mynd 7 af 11 Íslensku landsliðskonurnar hita upp fyrir leikinn á keppnisvellinum í Manchester í dag. mbl.is/Eggert Jóhannesson

Mynd 8 af 11 Eggert Jóhannesson

Mynd 9 af 11 Eggert Jóhannesson

Mynd 10 af 11 Eggert Jóhannesson

Mynd 11 af 11 mbl.is/Eggert Jóhannesson

Berglind Björg Þorvaldsdóttir skoraði mark íslenska kvennalandsliðsins í knattspyrnu þegar liðið mætti Belgíu í fyrsta leik sínum í D-riðli Evrópumótsins á akademíuvelli Manchester City í Manchester á Englandi í dag.

Belgar fengu hættulegri marktækifæri til að byrja með og Janice Cayman og Tessa Wullaert áttu báðar skot að marki íslenska liðsins á fyrstu tíu mínútum leiksins sem Sandra Sigurðardóttir varði vel í blði skiptin.

Á 26. vann íslenska liðið boltann ofarlega á vellinum eftir frábæra pressu Berglindar Bjargar Þorvaldsdóttur og Karólínu Leu Vilhjálmsdóttur.

Berglind renndi boltanum svo í gegn á Sveindísi Jane Jónsdóttur sem var sloppin ein í gegn en Sveindís hitti boltann ekki, ein gegn Nicky Evrard í marki Belga, og færið rann út í sandinn.

Fjórum mínútum síðar fékk íslenska liðið vítaspyrnu eftir að skot Sveindísar hafnaði í hönd vinstri bakvarðar Belgíu.

Tess Olafsson, dómari leiksins, studdist við VAR-myndbandsdómgæsluna áður en hún dæmdi vítaspyrnu og Berglind Björg steig á punktinn.

Evrard í marki Belga skutlaði sér hins vegar í rétt horn og varði spyrnu Berglindar og staðan því áfram markalaus.

Besta færi Belga í fyrri hálfleik kom á 45. mínútu þegar Elena Dhont fékk frítt skot í vítateig íslenska liðsins eftir laglegt samspil en hún hitti boltann illa og skotið fór framhjá.

Glódís Perla Viggósdóttir átti síðustu marktilraun síðari hálfleiks þegar hún reyndi að skrúfa boltann upp í samskeytin, rétt utan teigs, eftir langt innkast Sveindísar en skotið fór rétt yfir markið og staðan því markalaus í hálfleik.

Íslenska liðið byrjaði seinni hálfleikinn af miklum krafti og Sveindís Jane prjónaði sig í gegnum varnarmenn Belga strax á upphafsmínútunum. Hún átti fast skot með vinstri fæti sem Evrard í marki Belga varði mjög vel.

Berglind Björg kom svo íslenska liðinu yfir á 50. mínútu þegar Karólína Lea átti frábæra sendingu frá vinstri kantinum.

Boltinn barst á fjærstöngina þar sem Berglind Björg fékk frían skalla og hún stangaði boltann í netið af stuttu færi og staðan orðin 1:0.

Tíu mínútum síðar var Elena Dhont við það að sleppa í gegnum vörn íslenska liðsins en Sandra kom út úr markinu, lokaði vel á hana, og hirti svo boltann af henni.

Á 64. mínútu fengu Belgar svo dæma vítaspyrnu þegar Elena Dhont fór niður í vítateig íslenska liðsins eftir samstuð við varnarmenn Íslands. Justine Vanhaevermaet steig á punktinn og hún gerði engin mistök, sendi Söndru í vitlaust horn og staðan orðin 1:1.

Dagný Brynjasdóttir fékk gott tækifæri til þess að komast Íslandi yfir á nýjan leik á 71. mínútu eftir hornspyrnu frá vinstri en Evrard í marki Belga varði meistaralega frá henni.

Tessa Wullaert átti lúmskt skot á 79. mínútu, rétt utan teigs, þegar hún reyndi að smyrja boltann upp í samskeytin en Sandra var snögg til og varði mjög vel frá henni í hornspyrnu.

Jafnræði var með liðunum á lokamínútunum og fengu bæði lið tækifæri til þess að koma boltanum í netið og svekkjandi jafntefli því niðurstaðan.

Ísland er með 1 stig í riðlinum eftir einn leik, líkt og Belgía, en síðar í dag mætast Frakkland og Ítalía í Rotherham.

Belgía

1:1

Ísland

Loka

Justine Vanhaevermaet (67. mín.)	Mörk	Berglind Björg Þorvaldsdóttir (50. mín.)
Justine Vanhaevermaet (86. mín.)	Spjöld

mín.

90		Leik lokið Leik lokið með 1:1-jafntefli. Gríðarlega svekkjandi niðurstaða fyrir íslenska liðið sem fékk miklu hættulegri færi.
90		Ella Van Kerkhoven (Belgía) kemur inn á
90		Tessa Wullaert (Belgía) fer af velli
90		Alexandra Jóhannsdóttir (Ísland) á skalla sem fer framhjá Nú er það Alexandra sem á hörkuskalla en boltinn framhjá.
90		Alexandra Jóhannsdóttir (Ísland) kemur inn á
90		Karólína Lea Vilhjálmsdóttir (Ísland) fer af velli
90		+3 mínútur í uppbótartíma.
90		Ísland fær hornspyrnu Aukaspyrna dæmd.
89		VÁ! Belgar að fá vítapsyrnu en hún er sem betur fer fllögguð rangstæð.
88		Karólína Lea Vilhjálmsdóttir (Ísland) á skot framhjá Karólína með geggjað skot en boltinn rétt framhjá. Íslenska liðið vildi fá víti eftir að Sveindís átti skot í varnarmann Belga en ekkert dæmt.
87		Karólína Lea Vilhjálmsdóttir (Ísland) á skot framhjá Karólína reynir skot úr aukaspyrnu af 35 metra færi en boltinn hátt yfir markið.
87		Karólína Lea Vilhjálmsdóttir (Ísland) á skot framhjá Karólína reynir skot úr aukaspyrnu af 35 metra færi en boltinn hátt yfir markið.
87		Agla María Albertsdóttir (Ísland) kemur inn á
87		Sara Björk Gunnarsdóttir (Ísland) fer af velli Fyrirliðinn af velli.
86		Justine Vanhaevermaet (Belgía) fær gult spjald Allt of sein í tæklingu og hún straujar Dagnýju.
85		Svava Rós með hættulega fyrirgjöf frá hægri en enginn mættur í teiginn til þess að taka á móti þessu.
83		Belgar að setja smá pressu á íslenska liðið þessa stundina en Ísland verst vel.
81		Dagný Brynjarsdóttir (Ísland) á skalla sem fer framhjá Dagný með frían skalla en hún nær ekki að stýra þessu á markið.
80		Jody Vangheluwe (Belgía) á skalla sem er varinn Fastur skalli en Sandra vel staðsett og grípur boltann.
79		Belgía fær hornspyrnu
79		Tessa Wullaert (Belgía) á skot sem er varið VÁ! Wullaert reynir að krulla boltann framhjá Söndru, rétt utan teigs, en Sandra ver frábærlega.
78		Hannah Eurlings (Belgía) kemur inn á
78		Elena Dhont (Belgía) fer af velli
76		Hamagangur í vítateig Belga, enn og aftur eftir langt innkast Sveindísar, en Evrard handsamar knöttinn.
74		Ísland fær hornspyrnu Belgar hreinsa.
72		Berglind Björg Þorvaldsdóttir (Ísland) fer af velli
71		Svava Rós Guðmundsdóttir (Ísland) kemur inn á
71		Dagný Brynjarsdóttir (Ísland) á skalla sem fer framhjá Aftur stekkur Dagný hæst í teignum en núna fer skallinn yfir markið.
71		Ísland fær hornspyrnu
71		Dagný Brynjarsdóttir (Ísland) á skalla sem er varinn VÁ! Dagný stekkur hæst í teignum og á hörkuskalla sem Evrard ver. Hún er að eiga leik lífs síns hérna.
70		Ísland fær hornspyrnu
68		Tessa Wullaert (Belgía) á skot framhjá Wullaert reynir skot af 30 metra færi en boltinn yfir markið.
67		MARK! Justine Vanhaevermaet (Belgía) skorar úr víti 1:1 - Belgar jafna. Vanhaevermaet mjög örugg og sendir Söndru í vitlaust horn. Allt jafnt í Manchester.
64		Belgía fær víti Belgarnir að fá vítaspyrnu! Dhont fer niður í teignum og dómarinn dæmir vítaspyrnu. Þetta virkaði ansi soft hérna úr stúkunni en ég sá þetta ekki nægilega vel því miður.
61		Karólína Lea Vilhjálmsdóttir (Ísland) á skot sem er varið Karólína lætur bara vaða, utarlega rétt utan teigs, en Evrard grípur boltann.
60		Dhont við það að sleppa í gegn en Sandra kemur í á móti og hirðir boltann af henni. Virkilega vel gert.
60		Tine De Caigny (Belgía) á skalla sem er varinn Fínasta skalli en Sandra handsamar þetta.
59		Julie Biesmans (Belgía) á skot sem er varið Fast skot af 25 metra færi en boltinn beint á Söndru í markinu.
57		Belgía fær hornspyrnu Ísland hreinsar.
54		Sara Björk Gunnarsdóttir (Ísland) á skot framhjá Jájá Sara Björk reynir bara hjólhestaspyrnu eftir darraðadans í vítateig belgíska liðsins en boltinn yfir markið. Frábær tilraun.
53		Ísland fær hornspyrnu
50		MARK! Berglind Björg Þorvaldsdóttir (Ísland) skorar 0:1 - ÍSLAND SKORAR! Karólína með geggjaða fyrirgjöf frá hægri, eftir að Belgar höfðu hreinsað úr hornspyrnunni, og þar er Berglind Björg mætt og hún stangar boltann í markið! Ísland er komið yfir!
49		Ísland fær hornspyrnu
47		Ísland fær hornspyrnu Boltinn endar fyrir aftan endamörk.
47		Sveindís Jane Jónsdóttir (Ísland) á skot sem er varið DAUÐAFÆRI! Sveindís með frábæran sprett og labbar framhjá varnarmönnum Belga. Á svo fast skot með vinstri fæti sem Evrard ver mjög vel.
46		Seinni hálfleikur hafinn Þá er síðari hálfleikurinn kominn af stað og það eru Belgar sem hefja leik.
45		Hálfleikur Hálfleikur í Manchester og staðan er markalaus. Íslenska liðið fengið tvö frábær færi, meðal annars vítaspyrnu, en boltinn hefur ekki ennþá farið í netið og liðið því jöfn.
45		Glódís Perla Viggósdóttir (Ísland) á skot framhjá Boltinn dettur fyrir Glódísi eftir langt innkast frá vinstri en skot hennar frer rétt yfir markið.
45		+2 mínútur í uppbótartíma.
45		Elena Dhont (Belgía) á skot framhjá FÆRI! Flott spil hjá belgísku liðinu og þær komast aftur fyrir Hallberu. Eiga flotta fyrirgjöf í teiginn en Dhont hittir boltann illa og hann endar fyrir aftan endamörk.
43		Ísland fær hornspyrnu Belgar hreinsa.
42		Belgarnir hafa ekki verið neitt sérstaklega ógnandi þessar síðustu mínútur en núna eiga þær fyrirgjöf frá hægri sem siglir aftur fyrir endamörk.
39		Karólína með flottan sprett á hægri kantinum og á stórhættulega fyrirgjöf sem Evrard handsamar.
35		Ísland fær hornspyrnu FÆRI! Varnarmenn Belga hreinsa í Dagnýju og þaðan fer boltinn rétt yfir markið.
33		Berglind Björg Þorvaldsdóttir (Ísland) skorar ekki úr víti Nei nei nei nei! Belgíski markvörðurinn ver spyrnuna! Kastar sér í rétt horn og grípur boltann!
32		Ísland fær víti Dómarinn er að dæma víti! Berglind Björg stígur á vítapunktinn og ætlar að taka þetta!
30		Belgía (Belgía) VAR Myndbandsdómgæslan er að skoða hvort Ísland eigi að fá vítaspyrnu. Boltinn virtist fara í höndina á varnarmanni Belga. Dómarinn er að skoða þetta.
30		Ísland fær hornspyrnu
26		DAUÐAFÆRI! Berglind og Karólína vinna boltann ofarlega á vellinum. Berglind leggur hann á Sveindísi sem var komin í gegn en hún hittir ekki boltann, ein gegn Evrard! Þarna átti Ísland að skora fyrsta markið.
23		Dagný Brynjarsdóttir (Ísland) á skalla sem fer framhjá Langt innkast frá Sveindísi frá vinstri. Belgar hreinsa beint á Sif sem sendir boltann fyrir og þar er Dagný mætt en hún nær ekki að stýra þessu á markið.
21		Sveindís enn og aftur með flottan sprett en Belgar ná að reka tánna í boltann í fyrirgjöfinni og þær hreinsa svo.
19		Belgarnir halda vel í boltann þessa stundina og leyfa íslenska liðinu lítið að snerta hann.
15		Berglind Björg með flotta pressu og Ísland vinnur boltann ofarlega á vellinum.
14		Tessa Wullaert (Belgía) á skot sem er varið Wullaert á laust skot, rétt innan teigs, sem Sandra ver þægilega.
12		Ísland fær hornspyrnu Hornspyrnan rennur út í sandinn eftir smá darraðadans í vítateig belgíska liðsins.
9		Janice Cayman (Belgía) á skot sem er varið VÁ! Cayman kemst inn fyrir Sif eftir fyrirgjöf frá hægri og hún nær að reka tánna í boltann en Sandra er vel staðsett og nær að handsama boltann.
6		Frábært samspil hjá Gunnhildi og Karólínu á hægri kantinum og Gunnhildur á góða fyrirgjöf á Berglindi sem nær ekki að snúa í átt að marki.
4		Sveindís að byrja þennan leik af miklum krafti og hikar ekki við að taka hægri bakvörð Belga, Jody Vangheluwe, á.
1		Leikur hafinn Þá er þetta komið af stað og það er íslenska liðið sem byrjar með boltann.
0		Þá eru þjóðsöngvarnir búnir og leikmenn íslenska liðsins tóku vel undir. Þær virka einstaklega tilbúnar í þetta og núna fer dómarinn alveg að flauta til leiks. Áfram Ísland!
0		Íslenska liðið er mætt í leikmannagönginn og allir í stúkunni eru staðnir á fætur. Það er í ótrúleg stemning hérna og það mikil spenna í loftinu. Algjörlega magnað að upplifa þetta og ég fullyrði að þetta hafi aldrei verið svona á lokamóti kvenna áður.
0		Stúkurnar eru að fyllast og það er verið að leggja alla borða á völlinn. Þetta er alveg að bresta á og liðin eru að fara ganga út á völlinn.
0		Það er frábær stemning í stúkunni hjá stuðningsmönnum beggja liða og núna rétt í þessu voru stuðningsmenn íslenska liðsins að syngja hinn þjóðsönginn okkar Ég er kominn heim. Myndband af þessum stórkostlega fjöldasöng má sjá á samfélagsmiðlum mbl.is.
0		Það er hlýtt í Manchester í dag, 26 stiga hiti, sól og gola. Fínar aðstæður fyrir fótboltaleik, kannski betri fyrir áhorfendur en fyrir leikmenn!
0		Sif Atladóttir spilar sinn 90. A-landsleik í dag og er sú fjórtánda frá upphafi til að ná þeim leikjafjölda. Þær Guðrún Arnardóttir, Sveindís Jane Jónsdóttir og Karólína Lea Vilhjálmsdóttir spila allar sinn 20. A-landsleik.
0		Sara Björk Gunnarsdóttir heldur áfram að ná stórum áföngum og í dag er hún fyrst Íslendinga til að spila 140 A-landsleiki í fótbolta.
0		Það er heldur ekkert óvænt að sjá í byrjunarliði Belgíu. Þeirra helstu kanónur, Tessa Wullaert, Janice Cayman, Tine De Caigny og Julie Biesmans eru allar á sínum stað.
0		Sandra í markinu, Sif, Glódís, Guðrún og Hallbera í vörninni, Gunnhildur, Dagný og Sara á miðjunni og þær Karólína, Berglind og Sveindís í framlínunni.
0		Byrjunarliðin voru að birtast rétt í þessu og Þorsteinn Halldórsson kemur ekki á óvart í liðsvali sínu. Hann hefur leik með þær sömu ellefu og hófu leikinn gegn Pólverjum á dögunum.
0		Þær eru mættar! 🇮🇸ÍSLAND🇮🇸#dottir pic.twitter.com/cHvlyf6sgo — Knattspyrnusambandið (@footballiceland) July 10, 2022
0		Þegar Belgía vann Ísland óvænt 1:0 árið 2012 skoraði 19 ára stúlka, Tessa Wullaert, sigurmarkið. Hún er fyrirliði Belga í dag, markahæst í sögu landsliðsins, og var í þrjú ár samherji Söru Bjarkar Gunnarsdóttur hjá Wolfsburg í Þýskalandi. Hún leikur á næsta tímabili við hlið Hildar Antonsdóttir í nýju hollensku úrvalsdeildarliði, Fortuna Sittard.
0		Ísland og Belgía hafa aðeins þrisvar áður mæst í A-landsleik kvenna. Liðin voru saman í riðli fyrir EM 2013 og gerðu þá 0:0 jafntefli á Laugardalsvellinum og Belgar unnu sinn heimaleik 1:0. Ísland vann síðan 2:1 þegar liðin mættust í Algarve-bikarnum í Portúgal árið 2016 þar sem Dagný Brynjarsdóttir skoraði sigurmarkið í uppbótartíma leiksins.
0		Liðin eru í D-riðli með Frakklandi og Ítalíu sem mætast í Rotherham klukkan 19 í kvöld. Tvö efstu lið riðilsins komast í átta liða úrslit en hin tvö fara heim eftir riðlakeppnina. Fyrirfram er þessi riðill talinn einn sá mest spennandi í keppninni. Frakkar eru í 3. sæti heimslista FIFA og eiga að vera sterkastir en Ítalir eru í 14. sæti, Íslendingar í 17. sæti og Belgar í 19. sæti þannig að lítill munur er talinn vera á þessum þremur liðum.
0		Velkomin með mbl.is á Manchester City Academy Stadium í Manchester þar sem íslenska kvennalandsliðið hefur keppni á Evrópumótinu klukkan 16 með leik gegn Belgum.

Sjá meira

Sjá allt

Belgía: (4-4-2) Mark: Nicky Evrard. Vörn: Jody Vangheluwe, Sari Kees, Laura De Neve, Davina Philtjens. Miðja: Janice Cayman, Justine Vanhaevermaet, Tine De Caigny, Julie Biesmans. Sókn: Elena Dhont (Hannah Eurlings 78), Tessa Wullaert (Ella Van Kerkhoven 90).
Varamenn: Diede Lemey (M), Lisa Lichtfus (M), Ella Van Kerkhoven, Amber Tysiak, Sarah Wijnants, Hannah Eurlings, Feli Delacauw, Davinia Vanmechelen, Marie Minnaert, Charlotte Tison, Laura Deloose, Kassandra Missipo.

Ísland: (4-3-3) Mark: Sandra Sigurðardóttir. Vörn: Sif Atladóttir, Glódís Perla Viggósdóttir, Guðrún Arnardóttir, Hallbera Guðný Gísladóttir. Miðja: Gunnhildur Yrsa Jónsdóttir , Dagný Brynjarsdóttir, Sara Björk Gunnarsdóttir (Agla María Albertsdóttir 87). Sókn: Karólína Lea Vilhjálmsdóttir (Alexandra Jóhannsdóttir 90), Berglind Björg Þorvaldsdóttir (Svava Rós Guðmundsdóttir 71), Sveindís Jane Jónsdóttir.
Varamenn: Telma Ívarsdóttir (M), Auður S. Scheving (M), Elísa Viðarsdóttir, Ingibjörg Sigurðardóttir, Selma Sól Magnúsdóttir, Alexandra Jóhannsdóttir, Elín Metta Jensen, Agla María Albertsdóttir, Áslaug Munda Gunnlaugsdóttir, Guðný Árnadóttir, Svava Rós Guðmundsdóttir, Amanda Andradóttir.