Ótrúlega leiðinlegt að yfirgefa stelpurnar
Setja bókamerki
„Þetta voru ótrúlega mikil vonbrigði,“ sagði Cecilía Rán Rúnarsdóttir, markvörður íslenska kvennalandsliðsins í knattspyrnu, í samtali við mbl.is eftir 1:1-jafntefli Íslands og Belgíu í D-riðli Evrópumótsins á akademíuvelli Manchester City í Manchester á Englandi í gær.
Cecilía fingurbrotnaði á æfingu íslenska liðsins á föstudaginn síðasta en Auður Scheving, markvörður Vals og lánsmaður hjá Aftureldingu, var kölluð inn í íslenska hópinn í stað hennar.
„Ég var á æfingu á föstudaginn og ég skutlaði mér á boltann, niðri vinsta megin. Þetta var fast skot sem lenti beint á litla puttanum á mér og hann brotnaði. Þetta hefði getað verið verra og það er því ekkert annað í stöðunni en að einblína á það jákvæða,“ sagði Cecilía.
Cecilía er á leið í aðgerð í Þýskalandi og því óvíst með framhaldið hjá henni.
„Auðvitað vil ég vera áfram með stelpunum en ég fer til Þýskalands í dag og svo í aðgerð á morgun. Ef allt gengur að óskum fæ ég að koma aftur út og hitta stelpurnar en það er ótrúlega leiðinlegt að þurfa yfirgefa þær á þessum tímapunkti,“ sagði Cecilía.
