Sara Björk og Sveindís í uppáhaldi
Setja bókamerki
„Við erum hérna til þess að fylgjast með íslenska landsliðinu,“ sögðu þau Svala Margrét Jónsdóttir, Karítas Svava Karlsdóttir og Elvar Guðni Karlsson í samtali við mbl.is í Manchester í gær.
Fjöldi Íslendinga er samankominn í Manchester þessa dagana þar sem íslenska kvennalandsliðið í knattspyrnu tekur þátt í lokakeppni Evrópumótsins.
Svala Margrét 10 ára, Karítas Svava 11 ára og Elvar Guðni 7 ára eru í hópi yngri stuðningsmanna íslenska liðsins á mótinu en þau æfa öll fótbolta og hafa tröllatrú á íslenska liðinu.
„Sara Björk Gunnarsdóttir og Sveindís Jane Jónsdóttir eru í sérstöku uppáhaldi hjá okkur,“ sögðu þær Svala og Karítas.
„Sandra er minn uppáhaldsleikmaður því að hún er markmaður, alveg eins og ég,“ bætti Elvar Guðni við.
„Við höfum mikla trú á stelpunum og þær eru að fara vinna Ítalíu,“ bættu krakkarnir kampakátir við í samtali við mbl.is.
