Rauð viðvörun á leikdegi Íslands
Setja bókamerki
Ísland mætir Frakklandi í lokaleik sínum í D-riðli Evrópumóts kvenna í knattspyrnu á morgun í Rotherham en spáð er allt að 40 stiga hita á Bretlandseyjum næstu daga.
Bresk stjórnvöld hafa gefið út rauða viðvörun vegna hitabylgjunnar en sérfræðingar í landinu búast við því að hitamet geti fallið.
Mest hefur hitinn farið í 39° stig á Bretlandseyjum síðan mælingar hófust og því viðbúið að aðstæður á Englandi verði einstaklega erfiðar fyrir knattspyrnuiðkun.
Í Rotherham er talið að hitinn nái mest 33° gráðum en mestum hita er spáð á suðurströnd Englands.
Leikur Íslands og Frakklands hefst klukkan 20 að staðartíma en þá á hitinn að vera í kringum 30° gráður í Rotherham. Því er einnig spáð að sólin muni skína skært á leikdegi.
Íslenska liðið þarf sigur til þess að tryggja sér sæti í 8-liða úrslitum keppninnar en jafntefli gæti einnig dugað, gegn því að Ítalía og Belgía geri jafntefli í sínum leik í Manchester á sama tíma.
Tap með minnsta mun gegn Frakklandi gæti einnig dugað til þess að komast áfram en þó aftur gegn því að Ítalía og Belgía geri jafntefli.
