Anthony Gordon, kantmaður enska landsliðsins í knattspyrnu og Newcastle United, lenti í óhappi þegar hluti leikmannahópsins fór í hjólreiðatúr fyrir æfingu í Þýskalandi í morgun.
Sky Sports greinir frá því að Gordon hafi orðið fyrir því óláni að falla af fjallahjóli sínu með þeim afleiðingum að hann meiddist lítillega á kjálka og fékk skurð á hökuna.
Áverkarnir voru ekki alvarlegir og tók Gordon fullan þátt í æfingu enska landsliðsins síðar um daginn.
Er hann því þrátt fyrir óhappið klár í slaginn fyrir leik Englands gegn Slóvakíu í 16-liða úrslitum Evrópumótsins í Gelsenkirchen á sunnudag.