Svisslendingar mun sterkari en Ítalir
Setja bókamerki
Sviss varð í dag fyrsta liðið til að tryggja sér sæti í átta liða úrslitum EM karla í fótbolta með verðskulduðum sigri á Ítalíu, 2:0, í fyrsta leik 16-liða úrslitanna á Ólympíuleikvanginum í Berlín.
Sviss mætir Englandi eða Slóvakíu í átta liða úrslitum.
Svissneska liðið byrjaði mun betur og fór fyrri hálfleikur mikið fram á vallarhelmingi ríkjandi Evrópumeistaranna.
Breel Embolo var nálægt því að skora fyrsta markið á 25. mínútu er hann slapp einn gegn Gianluigi Donnarumma en ítalski markvörðurinn varði glæsilega frá honum.
Donnarumma kom hins vegar engum vörnum við á 37. mínútu þegar Remo Freuler skoraði af stuttu færi í teignum eftir sendingu frá Ruben Vargas. Var staðan í leikhléi því 1:0.
Það tók Svisslendinga tæpa mínútu að bæta við öðru markinu í seinni hálfleik er Vargas skoraði sjálfur með glæsilegu skoti upp í samskeytin fjær úr teignum eftir sendingu frá Michel Aebischer.
Ítalía var nálægt því að minnka muninn á 52. mínútu er Fabian Schär skallaði boltann í stöngina á eigin marki, en Svisslendingar sluppu með skrekkinn.
Gianluca Scamacca setti boltann í stöngina á marki Sviss á 74. mínútu en þess fyrir utan sköpuðu Ítalir lítið og Svisslendingar sigldu verðskulduðum sigri í höfn.
| Sviss | 2:0 | Ítalía |
|
|---|---|---|---|
| Aðeins tvær mínútur í uppbótartíma. Svisslendingar fyrstir í átta liða úrslit, það er ljóst. | |||
