Franska B-deildarliðið Metz hefur virkjað kaupákvæði í lánssamningi georgíska landsliðsframherjans Georges Mikautadze. Mikautadze var markahæsti leikmaður Georgíu með þrjú mörk á EM í fótbolta.
Möguleiki er á að Metz kaupi leikmanninn eingöngu til að selja hann strax aftur en Mónakó hefur verið nefnt sem mögulegur áfangastaður hins 23 ára gamla Mikautadze.
Mikautadze skoraði þrettán mörk í tuttugu leikjum fyrir Metz í vetur en liðið féll úr 1. deildinni. Georgía féll úr keppni í gær þegar liðið tapaði 4:1 gegn Spánverjum í sextán liða úrslitum Evrópumótsins.