Tyrkneski knattspyrnumaðurinn Merih Demiral hefur verið úrskurðaður í tveggja leikja bann á Evrópumótinu í fótbolta í Þýskalandi.
Demiral fær bannið fyrir að fagna með því að gera úlfatákn með höndunum. Það er tákn Gráúlfanna, hóps öfgaþjóðernissinna í Tyrklandi. Þetta hefur þýski miðilinn Bild eftir UEFA.
Táknið hefur til að mynda verið bannað í Austurríki og Frakklandi en ekki enn í Þýskalandi.
Demiral skoraði bæði mörk Tyrklands í sigri liðsins á Austurríki, 2:1, í 16-liða úrslitum Evrópumótsins á dögunum.
Tyrkland mætir Hollandi í átta liða úrslitunum í Berlín næsta laugardag.