Holland í undanúrslit eftir svakalegan leik
Setja bókamerki
Holland hafði betur gegn Tyrklandi, 2:1, í svakalegum leik í átta liða úrslitum Evrópumótsins í knattspyrnu í Berlín í kvöld.
Holland mætir því Englandi í undanúrslitum í Dortmund á miðvikudaginn.
Memphis Depay fékk fyrsta færi leiksins á fyrstu mínútu þegar hann prjónaði sig í gegnum vörn Hollands og inn á teig en skot hans fór hátt yfir markið.
Leikurinn róaðist í kjölfarið. Holland var meira með boltann en Tyrkir voru kröftugir í sínum sóknum.
Fyrsta færi Tyrkja kom eftir rúman hálftímaleik. Þá kom Hakan Calhanoglu með frábæran bolta úr aukaspyrnu inn á teig Hollands sem Abdülkerim Bardakci komst í en skot hans fór yfir.
Tyrkir héldu áfram að ógna og á 35. mínútu kom Samet Akaydin þeim yfir. Það gerðist eftir að hornspyrna Tyrklands var skölluð frá á Arda Güler. Hann tók boltann niður og kom með frábæra fyrirgjöf á Akaydin á fjærstönginni sem stangaði boltann í netið, sláin inn.
Tyrkland fór inn í hálfleikinn með verðskuldaða 1:0 forystu.
Holland mætti með meiri kraft inn í síðari hálfleikinn og kom strax í ljós að innkoma Wout Weghorst, sem kom inn á í hálfleik, hafði jákvæð áhrif á sóknarleik þeirra.
Arda Güler átti lúmska tilraun úr aukaspyrnu á 56. mínútu. Þá reyndi hann að leggja boltann niðri í fjærhornið af 25 metra færi en skot hans hafnaði í stönginni.
Varamaðurinn Wout Weghorst fékk gott færi á 70. mínútu þegar Memphis Depay lyfti boltanum inn fyrir á hann en Mert Günok gerði vel að verja fyrir honum aftur fyrir í hornspyrnu.
Memphis Depay tók hornspyrnuna stutt á Jerdy Schouten sem lagði boltann aftur á Depay. Hann kom með stórkostlega fyrirgjöf sem rataði á kollinn á Stefan de Vrij sem skallaði boltann í netið. Staðan orðin 1:1.
Á 76. mínútu komst Holland yfir með sjálfsmarki frá Mert Müldür. Það kom eftir að Denzel Dumfries renndi boltanum þvert fyrir markið á fjærstöngina þar sem Cody Gakpo og Müldür voru í harðri baráttu en boltinn fór af Müldür og þaðan í markið.
Varamaðurinn Zeki Celik var nálægt því að jafna metin á 85. mínútu þegar hann fékk boltann á fjærstönginni en Micky Van de Ven náði að koma sér fyrir skotið.
Á síðustu mínútu venjulegs leiktíma fékk Semih Kilicsoy hörkufæri þegar fyrirgjöf fór í lærið hans og þaðan á markið en Bart Verbruggen varði glæsilega frá honum.
Tyrkir héldu áfram að pressa Hollendinga en náðu ekki að koma boltanum í netið. Lokaniðurstöður í dag, 2:1 sigur Hollands sem er komið í undanúrslit.
| Holland | 2:1 | Tyrkland |
|
|---|---|---|---|
| Tyrkland fær gult spjald Einhver á bekk Tyrkja fær gult spjald. Sé ekki hver. | |||
