Spánverjar Evrópumeistarar 2024

Spánn er Evrópumeistari karla í fótbolta árið 2024 eftir sigur á Englandi, 2:1, í úrslitaleik á Ólympíuleikvanginum í Berlín í kvöld. Mikel Oyarzabal skoraði sigurmarkið á 87. mínútu.

Fyrri hálfleikur var mjög lokaður og gekk báðum liðum illa að skapa sér færi. Phil Foden fékk það besta fyrir England á lokamínútunni en skaut beint á Unai Simón í marki Spánverja úr þröngu færi.

Hinum megin þurfti Jordan Pickford lítið að taka á honum stóra sínum og var staðan markalaus í hálfleik.

Hún var það ekki lengi í seinni hálfleik því Nico Williams kom Spánverjum yfir á 47. mínútu er hann slapp inn fyrir vörn Englendinga eftir sendingu frá Lamine Yamal.

Spánverjar voru líklegri til að bæta við en Englendingar að jafna næstu mínútur og þeir Nico Williams og Yamal komust báðir í fín færi en Williams skaut rétt framhjá og Pickford varði vel frá Yamal.

Englendingar nýttu sér það því Cole Palmer jafnaði á 73. mínútu með glæsilegu skoti utan teigs eftir að Jude Bellingham lagði boltann á hann.

Eftir markið voru Spánverjar sterkari og sigurmarkið kom á 87. mínútu er Oyarzabal kláraði af stuttu færi eftir góða sendingu frá Marc Cucurella og þar við sat, þrátt fyrir að bæði Declan Rice og Marc Guéhi hafi fengið góð skallafæri til að jafna í blálokin. 

Spánverjar eru nú sigursælasta liðið í sögu Evrópumótsins með fjóra meistaratitla en Englendingar hafa enn ekki orðið Evrópumeistarar.