Hungraður í að sanna sig með landsliðinu

„Við vorum drullusvekktir eftir leikinn gegn Ungverjalandi en við mætum klárir í þennan leik gegn Þýskalandi,“ sagði Haukur Þrastarson, leikmaður íslenska karlalandsliðsins í handknattleik, í samtali við mbl.is á liðshóteli íslenska liðsins í Köln í gær.

Íslenska liðið undirbýr sig nú fyrir fyrsta leik gegn Þýskalandi í milliriðli 1 í Lanxess-höllinni í Köln en bæði lið koma inn i milliriðlakeppnina án stiga.

„Ég hefði getað gert mun betur finnst mér í þessum Ungverjaleik og ég er aðeins ósáttur með mína frammistöðu þar. Ég hefði viljað gera miklu betur og mér finnst í raun ekki skipta máli hvernig leikurinn var að spilast, ég vil standa mig þegar ég kem inn á. Sem betur fer er stutt í næsta leik og við erum mjög spenntir að fá leik svona stuttu eftir Ungverjaleikinn þar sem við getum kvittað fyrir mistökin,“ sagði Haukur.

Getum gert miklu betur

Haukur hefur lítið fengið að spila á mótinu til þessa.

„Ég er mjög hungraður í að sanna mig, sérstaklega með landsliðinu, þar sem ég hef misst mikið úr á síðustu árum vegna meiðsla. Annars leggst þessi milliriðill mjög vel í mig og það er fullt af tækifærum í þessu.

Við höfum ekki náð að sýna okkar bestu hliðar og við erum allir meðvitaðir um það. Við getum gert miklu betur og við erum staðráðnir í að sýna fólki það í milliriðlakeppninni,“ sagði Haukur í samtali við mbl.is. 

• Blogga um frétt