Mikill þungi í þeim

Arnar Pétursson, þjálfari íslenska kvennalandsliðsins í handknattleik, býst við hörkuleik gegn Úkraínu í annarri umferð F-riðils EM 2024 í Innsbruck í Austurríki í kvöld.

Ísland tapaði með tveimur mörkum fyrir Hollandi í fystu umferð á föstudagskvöld. Síðar um kvöldið steinlá Úkraína svo fyrir Þýskalandi, 30:17.

Frétt af mbl.is

Sofnaði og lagði leikinn frá sér

„Leikurinn þeirra við Þýskaland segir okkur kannski meira um styrk þýska liðsins heldur en um Úkraínu. Þær eru með frábært lið og hertu tökin eftir því sem leið á leikinn í gær [á föstudag].

En samt sáum við það þá og höfum séð það í tveimur vináttuleikjum sem þær spiluðu í aðdraganda mótsins að þær eru vel þjálfaðar. Þetta eru líkamlega sterkir leikmenn, mikið afl í þeim og þær spila 6-0 vörn af festu og eru grimmar,“ sagði Arnar í samtali við mbl.is í gær.

Væri rosalega sætt

„Í sóknaraðgerðum er líka mikill þungi í þeim, þær koma í árásir í maður á mann eða kona á konu. Það er þungi í þeim árásum og svo klippingar í kjölfarið.

Við þurfum að undirbúa okkur vel en þurfum fyrst og fremst að halda áfram að fókusa á okkur og gera eins vel og hægt er,“ bætti hann við.

Spurður hvort hann væri bjartsýnn á fyrsta sigur íslenska kvennaliðsins á Evrópumóti í kvöld sagði Arnar að lokum:

„Auðvitað væri það rosalega sætt. Það væri rosalega gaman að ná því en ég held mig við það að fókusinn er núna á okkar frammistöðu og að gera eins vel og hægt er. Þá er aldrei að vita hvað gerist.“

Leikur Íslands og Úkraínu hefst klukkan 19.30 í kvöld.

• Blogga um frétt