Beckham á Íslandi

David Beckham fyrrverandi fyrirliði enska landsliðsins í knattspyrnu kom til Íslands seint í gærkvöld. Í tilkynningu frá umboðsskrifstofu hans er tilgangur ferðarinnar að ræða kaup á vörumerki Hamborgarabúllunnar, en Beckham hefur áhuga á að opna þrjú útibú í Los Angeles í Bandaríkjunum.

Beckham sást nýverið snæða búlluborgara ásamt syni sínum, Romeo, í London og líkaði borgarinn vel. Þetta hefur svo undið upp á sig og nú er kappinn kominn til Íslands til að ganga frá samningi þess efnis að opna útibúin í Los Angeles.

Af þessu tilefni mun Beckham ásamt fylgdarmönnum halda blaðamannafund á Hamborgarabúllunni á Bíldshöfða klukkan 12.00 í dag.

Ekki hafa borist neinar fregnir af því hvort Victoria eiginkona hans sé með í för, eða hve lengi kappinn hyggst dvelja á Íslandi. 

David Beckham er knattspyrnuáhugamönnum að góðu kunnur. Hann gat sér gott orð sem leikmaður Manchester United og Real Madríd áður en hann söðlaði um og samdi við LA Galaxy í Bandaríkjunum. Hann lék svo einnig fyrir AC Milan og PSG áður en hann lagði skóna á hilluna síðasta vor. Hann hefur svo undirbúið stofnun nýs knattspyrnufélags í Bandaríkjunum sem staðsett verður í Miami í Flórída og virðist nú ætla að hasla sér völl á skyndibitamarkaðnum með því að opna útibú frá Búllunni.

Frétt mbl.is: Beckham á Búllunni.

Uppfært kl. 23:52: Þessi frétt var skrifuð í tilefni dagsins, 1. apríl.