Setti Salah met, eða hvað?

Setti Mohamed Salah marka­met í ensku úr­vals­deild­inni í knatt­spyrnu í dag þegar hann gerði sitt 32. mark fyr­ir Li­verpool í deild­inni í vet­ur í 4:0 sigr­in­um á Bright­on í lokaum­ferðinni?

Ensk­ir fjöl­miðlar telja að svo sé og ís­lensk­ir miðlar hafa tekið það upp eft­ir þeim, en sú full­yrðing stenst varla þegar málið er skoðað nán­ar.

Um marka­met í úr­vals­deild­inni er ekki að ræða. Andy Cole og Alan Shear­er skoruðu 34 mörk hvor á tíma­bil­un­um 1993-94 og 1994-95.

Þá léku 22 lið í deild­inni og spiluðu því 42 leiki hvert, en frá 1995 hafa þau verið 20 og spilað 38 leiki á tíma­bili. Útfrá því hef­ur verið full­yrt að Salah sé nú hand­hafi marka­mets­ins í 38 leikja deild.

En það stenst ekki held­ur. Á ár­un­um 1906 til 1920 léku líka 20 lið í efstu deild á Englandi og þá skoruðu marka­hæstu menn nokkr­um sinn­um fleiri mörk en 32. Bert Freem­an skoraði 38 mörk fyr­ir Evert­on tíma­bilið 1908-1909 og eng­inn hef­ur gert bet­ur í deild­inni þegar hún hef­ur verið skipuð 20 liðum.

Salah vantaði því sex mörk til að ná Freem­an. 

Marka­metið í efstu deild á Englandi á hins veg­ar Dix­ie Dean sem skoraði 60 mörk fyr­ir Evert­on, í 22 liða deild, tíma­bilið 1927-1928.

Árið 1992 varð 1. deild­in á Englandi, sem hafði verið efsta deild þar í landi frá 1888, að úr­vals­deild. Þá byrjuðu ein­hverj­ir að skrifa meta­bæk­ur upp á nýtt og miða allt við árið 1992. Þá hafði hins­veg­ar enska deilda­keppn­in þegar verið í gangi í 104 ár. Lið sem unnu 1. deild­ina til árs­ins 1992 telj­ast eft­ir sem áður ensk­ir meist­ar­ar á viðkom­andi árum og varla er hægt að strika út ann­an ár­ang­ur sem náðist í deild­inni á ár­un­um 1888 til 1992.

En Mohamed Salah er markakóng­ur tíma­bils­ins 2017-2018 með 32 mörk fyr­ir Li­verpool. Harry Kane, sem  gerði tvö mörk fyr­ir Totten­ham í 5:4 sigri á Leicester, hafnaði í öðru sæti með 30 mörk. Þriðji varð Sergio Agüero sem skoraði 21 mark fyr­ir Manchester City.

• Blogga um frétt