Varnarmaðurinn Jonny Evans er við það að ganga til liðs við enska knattspyrnufélagið Leicester City en það er BBC sem greinir frá þessu. Evans hefur spilað með West Bromwich Albion í ensku úrvalsdeildinni, undanfarin þrjú ár.
Liðið féll niður í ensku B-deildina í vor og var talið næsta víst að Evans myndi yfirgefa félagið í sumar. Hann var sterklega orðaður við Tottenham í janúarglugganum síðasta en WBA vildi ekki selja hann á miðju tímabili.
Evans var fyrirliði WBA á síðasta tímabili en Leicester þarf að borga í kringum 3,5 milljónir punda fyrir miðvörðinn sem er þrítugur að aldri.