Það gengur hvorki né rekur hjá Sílemanninum Alexis Sánchez í liði Manchester United en enn og aftur olli hann stuðningsmönnum félagsins miklum vonbrigðum í leiknum gegn Wolves í ensku úrvalsdeildinni í knattspyrnu á laugardaginn.
Sánchez fékk sæti í byrjunarliði United á nýjan leik en hann var tekinn af velli á 63. mínútu og kom sú skipting engum á óvart.
Sánchez hefur ekki skorað í ensku úrvalsdeildinni frá því 31. mars á þessu ári þegar hann skoraði í leik á móti Swansea. Síðan þá hafa verið skoruð 347 mörk í deildinni af 164 mismunandi leikmönnum.
Sánchez kom til Manchester-liðsins frá Arsenal í janúar og er hæst launaði leikmaður félagsins.