Gylfi þór Sigurðsson er samkvæmt Sky Sports sá leikmaður sem er að spila best í ensku úrvalsdeildinni um þesar mundir.
Sky Sports heldur utan um sérstakan lista þar sem leikmönnum er raðað eftir frammistöðu sinni í síðustu leikjum. Á listanum er tillit tekið til 34 ólíkra tölfræðiþátta og horft til síðustu fimm leikja. Leikirnir hafa mismikið vægi en síðasti leikur hefur mesta vægið og svo koll af kolli.
Gylfi Þór, sem skoraði sigurmark Everton gegn Leicester með frábæru marki, hefur skorað þrjú mörk í síðustu leikjum og með frammistöðu sinni í síðustu leikjum hefur hann skákað Raheem Sterling úr toppsæti listans.
Á lista Sky Sports er Gylfi með 10.742 stig í efsta sæti, Alexsandre Lacazette úr Arsenal er annar með 9.637 stig og í þriðja sæti er Eden Hazard úr Chelsea með 9.598 stig.
Jóhann Berg Guðmundsson tekur stórt skref upp listann en hann er í 11. sætinu með 6.189 stig en Jóhann Berg lagði upp mark Burnley í jafntefli gegn Huddersfield og hefur nú lagt upp fjögur mörk í deildinni á tímabilinu.