Breskir fjölmiðlar greina frá því að vinstri bakvörðurinn Luke Shaw sé við það að gera nýjan samning við Manchester United en núgildandi samningur hans við félagið rennur út í sumar.
Shaw hefur verið í viðræðum við Manchester-liðið síðustu vikurnar um nýjan og betri samning og samkvæmt heimildum Daily Mail mun Shaw frá 150 þúsund pund í vikulaun en sú upphæð jafngildir um 23 milljónum króna. Þar með yrði hann einn hæst launaði varnarmaður heims en vikulaun Shaw í dag eru 100 þúsund pund.
Shaw er 23 ára gamall og kom til Manchester United frá Southampton fyrir fjórum árum. Bakvörðurinn varð fyrir alvarlegum hnémeiðslum í leik gegn PSV í Meistaradeildinni í septembermánuði 2015. Hann var frá keppni í tæpt eitt ár og á tímabili var óljóst hvort hann ætti afturkvæmt út á völlinn á ný. Shaw hefur verið einn besti leikmaður Manchester United á þessu tímabili og vann sér sæti í enska landsliðinu á nýjan leik.