Sóknarmaðurinn Ismaila Sarr mun kosta að minnsta kosti 40 milljónir punda enda vilja forráðamenn Watford ekki selja einn af sínum lykilmönnum ódýrt.
Sarr var einn besti leikmaður Watford á nýliðnu tímabili en liðið féll að lokum úr úrvalsdeildinni og Senegalinn talinn vera einn af stjörnum liðsins sem vilji frekar færa sig um set en að spila í B-deildinni í vetur. Hann skoraði fimm mörk í deildinni og lagði upp önnur.
Liverpool Echo hefur áður sagt frá því að Englandsmeistarar Liverpool hafi áhuga á að bæta Senegalanum við leikmannahópinn sinn en Watford keypti hann frá Rennes í Frakklandi á síðasta ári fyrir um 30 milljónir punda.
Liverpool verður hins vegar að opna veskið og borga allavega 40 milljónir fyrir Sarr sem er 22 ára gamall.