Tveir heimsmeistarar á leið til Manchester United

Tveir lyk­il­menn úr heims­meist­araliði Banda­ríkj­anna í knatt­spyrnu kvenna eru á leið til Manchester United, sam­kvæmt frétt BBC í dag.

Christen Press kem­ur frá Utah Royals, þar sem hún hef­ur verið liðsfé­lagi Gunn­hild­ar Yrsu Jóns­dótt­ur, og Tobin Heath kem­ur frá Port­land Thorns þar sem hún lék með Dag­nýju Brynj­ars­dótt­ur.

Heath hef­ur leikið 168 lands­leiki fyr­ir Banda­rík­in þar sem hún hef­ur skorað 33 mörk og átt 40 stoðsend­ing­ar. Press hef­ur leikið 138 lands­leiki þar sem hún hef­ur skorað 58 mörk og átt 37 stoðsend­ing­ar.

Báðar voru þær í heims­meist­araliðum Banda­ríkj­anna árin 2015 og 2019 og verða fræg­ustu leik­menn­irn­ir í sögu kvennaliðs Manchester United sem var end­ur­reist árið 2018, eft­ir þrett­án ára dvala, og leik­ur nú í ensku úr­vals­deild­inni.

Tvær aðrar úr heims­meist­araliðinu, Sam Mew­is og Rose Lavelle, gengu til liðs við Manchester City í ág­úst en keppni hef­ur meira og minna legið niðri í Banda­ríkj­un­um í ár vegna kór­ónu­veirunn­ar.

Keppni í ensku úr­vals­deild­inni hófst síðasta laug­ar­dag þar sem Manchester United gerði jafn­tefli, 1:1, við meist­ar­ana í Chel­sea. Fé­laga­skipta­glugga deild­ar­inn­ar verður lokað á fimmtu­dag­inn kem­ur.

• Blogga um frétt