Klopp: Mikilvægt að staldra við og njóta

Jürgen Klopp, knattspyrnustjóri Liverpool, stýrði liðinu til sigurs í ensku úrvalsdeildinni á síðasta keppnistímabili en þetta var fyrsti Englandsmeistaratitill félagsins í þrjátíu ár.

Þá var félagið að vinna ensku úrvalsdeildina í fyrsta sinn en deildin var stofnuð árið 1992.

Klopp tók við stjórnartaumunum hjá Liverpool í október 2015 og hefur liðið orðið Evrópumeistari, heimsmeistari og nú síðast Englandsmeistari undir stjórn þýska stjórans.

„Árið 2020 er stærsta árið á okkar knattspyrnuferli,“ sagði Klopp.

„Strákarnir voru svo gott sem orðnir Englandsmeistarar í mars sem er ótrúlegt afrek þegar maður horfir og hugsar til baka.

Við verðum Evrópueistarar árið áður og svo Englandsmeistarar í ár og það er ekki eitthvað sem gerist á hverju ári.

Þess vegna þurfum við að staldra við, vera stoltir og njóta augnabliksins, því það er mikilvægast,“ sagði Klopp.

Keppni í ensku úrvalsdeildinni hefst á morgun og mbl.is fjallar ítarlega um hana í samvinnu við Símann Sport.

Jürgen Klopp, knattspyrnustjóri Liverpool. AFP

• Blogga um frétt