Markvörðurinn Edouard Mendy verður kynntur til leiks hjá enska knattspyrnufélaginu Chelsea á morgun en þetta staðfesti Frank Lampard, stjóri Chelsea, eftir 6:0-sigur liðsins gegn Barnsley í 3. umferð enska deildabikarsins í kvöld.
Mendy er 28 +ara gamall en honum er ætlað að berjast um markvarðastöðuna við Kepa Arrizabalaga hjá félaginu en sá spænski hefur verið harðlega gagnrýndur að undanförnu.
Mendy kostar í kringum 18 milljónir punda en hann kemur til félagsins frá franska 1. deildarfélaginu Rennes þar sem hann lék á síðasta keppnistímabili.
Markvörðurinn verður sjöundi leikmaðurinn sem kemur til félagsins í sumar á eftir þeim Thiago Silva, Malang Sarr, Hakim Ziyech, Ben Chilwell, Timo Werner og Kai Havertz.