Líklegt að van Dijk spili á tímabilinu

Það bendir allt til þess að Virgil van Dijk, miðvörður Englandsmeistara Liverpool í knattspyrnu, verði klár í slaginn áður en tímabilinu lýkur í maí. 

Það er Sportsmail sem greinir frá þessu en van Dijk meiddist á hné í leik Everton og Liverpool í ensku úrvalsdeildinni um miðjan október og hefur ekki spilað síðan.

Fjölmiðlar á Englandi greindu frá því að van Dijk yrði að öllum líkindum frá út tímabilið en endurhæfing hollenska varnarmannsins hefur gengið framar vonum.

Van Dijk gæti snúið aftur til æfinga í mars og verið klár í slaginn í byrjun apríl en lokaleikur Liverpool á tímabilinu er gegn Crystal Palace á Anfield 23. maí næstkomandi.

Fyrsti leikur Liverpool í apríl verður gegn Arsenal á útivelli og gæti vel farið svo að van Dijk spilaði þann leik en Hollendingurinn, sem er 29 ára gamall, hefur verið einn besti varnarmaður heims undanfarin ár.

• Blogga um frétt