Mörkin munu koma

Thomas Tuchel, knattspyrnustjóri Chelsea á Englandi, hefur engar áhyggjur af Timo Werner, framherja liðsins.

Werner hefur ekki skorað í síðustu fjórtán leikjum sínum en hann gekk til liðs við Chelsea frá RB Leipzig síðasta sumar fyrir tæplega 50 milljónir punda.

Werner fór mjög vel af stað í búningi Chelsea en þegar líða tók á tímabilið fór að halla undan fæti hjá þýska framherjanum sem hefur skorað fjögur mörk í 22 leikjum í ensku úrvalsdeildinni á tímabilinu.

„Þrátt fyrir að hann sé ekki að skora þá hefur hann verið að spila virkilega vel,“ sagði Tuchel í samtali við Sky Sport.

„Hann lagði upp um helgina, fiskaði vítaspyrnuna sem við fengum gegn Tottenham, og ég sé sjálfstraustið hjá honum aukast með hverjum deginum sem líður á æfingasvæðinu.

Hann fær meira frjálsræði á vellinum núna en hann gerði og það hentar honum betur að mínu mati.

Það eina sem vantar eru mörkin og þau munu koma,“ bætti Tuchel við.

• Blogga um frétt