Fyrirliði Hamranna að hætta?

Mark Noble, fyrirliði og miðjumaður enska knattspyrnuliðsins West Ham United, hefur gefið í skyn að farið sé að styttast í annan endann á ferli hans.

„Ég verð 34 ára í maí. Ég á ekki mjög langt eftir en ég ætla að njóta hverrar einustu mínútu,“ sagði Noble við heimasíðu West Ham eftir 0:1 tap liðsins gegn Manchester United í 16 liða úrslitum ensku bikarkeppninnar á þriðjudagskvöld.

Spilatími Noble hefur minnkað talsvert á tímabilinu þar sem miðvallarleikmennirnir Declan Rice og Tomás Soucek hafa haldið honum á bekknum með frábærri spilamennsku. Noble leiddi þó liðið á Old Trafford á þriðjudag og spilaði allar 120 mínúturnar í framlengdum leik.

„Að spila á Old Trafford í kannski síðasta skiptið er sérstakt, því hvort ég spili á næsta ári vitum við ekki. Það er dapurlegt því ég mun ekki spila hér mjög oft til viðbótar, sem er synd og skömm,“ bætti hann við.

• Blogga um frétt