Franski miðjumaðurinn Eduardo Camavinga er á óskalista enska knattspyrnufélagsins Liverpool.
Það er Express sem greinir frá þessu en Jürgen Klopp, stjóri Liverpool, sér Camavinga sem arftaka Georginios Wijnaldums á miðsvæðinu.
Wijnaldum, sem er orðinn þrítugur, verður samningslaus í sumar og bendir allt til þess að hann sé á förum til Barcelona þegar samningur hans rennur út.
Camavinga, sem er einungis átján ára, er samningsbundinn Rennes í frönsku 1. deildinni.
Camavinga hefur leikið 30 leiki í frönsku 1. deildinni á tímabilinu þar sem hann hefur skorað eitt mark. Þá á hann að baki þrjá landsleiki fyrir Frakka.
Hann er samningsbundinn Rennes til sumarsins 2022 og er verðmetinn á 60 milljónir punda.