Áfall fyrir City

Sergio Agüero, framherji enska knattspyrnufélagsins Manchester City, verður fjarri góðu gamni þegar liðið mætir Chelsea í undanúrslitum ensku bikarkeppninnar á morgun.

Þetta staðfesti Pep Guardiola, knattspyrnustjóri City, á fjölmiðlafundi í dag en leikurinn fer fram á Wembley. 

Framherjinn er að glíma við meiðsli í kálfa en hann hefur aðeins byrjað fimm leiki í ensku úrvalsdeildinni á tímabilinu þar sem hann hefur skorað eitt mark.

Agüero verður samningslaus í sumar en félagið tilkynnti fyrr í þessum mánuði að framherjinn myndi yfirgefa félagið þegar samningur hans rennur út.

Leikur Chelsea og Manchester City fer fram á Wembley í London á morgun en í hinu undanúrslitaeinvígi bikarkeppninnar mætast Southampton og Leicester.

• Blogga um frétt