Stjóri Wolves á förum

Portúgalski knattspyrnustjórinn Nuno Espirito Santo og enska félagið Wolves hafa komist að samkomulagi um starfslok eftir þetta tímabil. Espirito Santo stýrir liðinu í síðasta sinn gegn Manchester United á heimavelli á sunnudaginn kemur.

Espirito Santo tók við Wolves árið 2017 og fór með liðið upp úr B-deildinni og upp í ensku úrvalsdeildina. Undir hans stjórn endaði Wolves í sjöunda sæti úrvalsdeildarinnar tímabilið 2018/19 og tryggði sér fyrir vikið sæti í Evrópukeppni í fyrsta sinn frá árinu 1980.

Ekki hefur gengið eins vel síðustu tvö tímabil og er liðið sem stendur í 12. sæti ensku úrvalsdeildarinnar með 45 stig.

• Blogga um frétt