Kennari með kynþáttafordóma í garð Rashfords

Marcus Rashford, leikmaður enska knattspyrnufélagsins Manchester United, varð fyrir kynþáttaníði á samfélagsmiðlum eftir tap United gegn Villarreal í úrslitum Evrópudeildarinnar í Gdansk í Póllandi í gær.

Leikmaðurinn greindi sjálfur frá þessu á samfélagsmiðlum sínum en í gærkvöldi höfðu honum borist 70 skilaboð sem innihéldu kynþáttafordóma í hans garð.

Rashford, sem er 23 ára gamall, átti ekki sinn besta dag í úrslitaleiknum frekar en flestir leikmenn United, sem tapaði úrslitaleiknum í dramatískri vítakeppni.

„Þeir sem eru að reyna láta mér líða verr en mér líður nú þegar; gangi ykkur vel,“ skrifaði Rashford á Twitter.

„Það sem gerir mig reiðan er sú staðreynd að einn af þeim sem sendu mér fjall af öpum er stærðfræðikennari með opinn reikning á samfélagsmiðlum.

Þetta er einhver sem kennir ungum börnum og veit að hann getur verið með kynþáttafordóma í garð annarra án þess að þurfa að taka afleiðingunum,“ bætti Rashford við.

• Blogga um frétt