Íþróttir | Enski boltinn | mbl | 27.5.2021 | 9:42 | Uppfært 10:13

Þetta var ekki gott tímabil

Ole Gunnar Solskjær var svekktur eftir tap sinna manna í Evrópudeildinni í gær. AFP

Ole Gunnar Solskjær, knattspyrnustjóri Manchester United, er ekki sáttur við árangur liðsins á tímabilinu, þrátt fyrir að liðið hafi endað í öðru sæti ensku úrvalsdeildarinnar og öðru sæti Evrópudeildarinnar.

United tapaði í vítakeppni fyrir Villarreal í úrslitum Evrópudeildarinnar í Gdansk í Póllandi í gær eftir að David de Gea brenndi af elleftu vítaspyrnu United-manna í bráðabana.

Þá endaði United með 74 stig í öðru sæti úrvalsdeildarinnar, 8 stigum minna en topplið Manchester City.

„Þetta var ekki gott tímabil,“ sagði Solskjær í samtali við BBC eftir tapið í úrslitaleiknum í gær.

„Það eru smáatriðin sem skipta máli í fótbolta og stundum getur ein vítaspyrna skorið úr um það hvort tímabilið hafi verið gott eða slæmt.

Við bættum okkur frá síðustu leiktíð og höfnuðum í öðru sæti en því miður tókst okkur ekki að landa sigri í Evrópudeildinni.

Ef við hefðum unnið vítakeppnina og Evrópudeildina væri svarið mitt á þá leið að þetta hefði verið gott tímabil.

Við erum hins vegar titlalausir og það er því rétt að segja að tímabilið hafi ekki verið nægilega gott,“ bætti Solskjær við.