Auðveldur sigur United á Tottenham

Manchester United vann sanngjarnan 3:0-útisigur á Tottenham í ensku úrvalsdeildinni í fótbolta í kvöld.

Leikmenn United voru betri frá fyrstu mínútu og skapaði Tottenham sér varla færi allan leikinn, en liðið átti ekki eitt einasta skot á markið.

Fyrsta markið gerði Cristiano Ronaldo á 39. mínútu með glæsilegu viðstöðulausu skoti eftir sendingu frá Bruno Fernandes. Ronaldo var aftur á ferðinni á 64. mínútu er hann átti glæsilega sendingu á Edinson Cavani sem skoraði af öryggi, einn gegn Hugo Lloris í marki Tottenham.

Leikmenn United voru ekki hættir því varamaðurinn Marcus Rashford gulltryggði sannfærandi sigur á 86. mínútu er hann slapp í gegn eftir sendingu frá Nemanja Matic og skoraði.

Sigurinn var kærkominn fyrir Manchester-liðið eftir 0:5-skellinn á heimavelli gegn Liverpool í síðustu umferð en Tottenham hefur tapað tveimur deildarleikjum í röð.

Manchester United fór með sigrinum upp í 17 stig og í fimmta sæti. Tottenham féll niður í það níunda, en þar er liðið með 15 stig.

Tottenham	0:3	Man. Utd	Opna lýsingu Loka
90. mín. Það verða að minnsta kosti þrjár mínútur í uppbótartíma.
Augnablik — sæki gögn...

• Blogga um frétt