United ætlar ekki að reka Solskjær

Enska knattspyrnufélagið Manchester United er ekki að hugsa um að reka Ole Gunnar Solskjær úr starfi. Það er The Athletic sem greinir frá þessu.

United tapaði 0:2-fyrir nágrönnum sínum í Manchester City í stórleik ensku úrvalsdeildarinnar á Old Trafford í Manchester um helgina.

United sá aldrei til sólar í leiknum og átti fleiri skot á eigið mark en mark City en framtíð Solskjærs hefur verið mikið í umræðunni á Englandi eftir slæm úrslit í undanförnum leikjum.

„Það er ekkert sem bendir til þess að Solskjær verði rekinn frá Manhcester United á næstu dögum,“ segir í umfjöllun The Athletic.

„Solskjær verður því að öllum líkindum við stjórnvölin í næsta leik gegn Watford. Stjórnin stendur við bakið á honum eins og sakir standa en óvíst er hversu lengi það endist,“ segir ennfremur í umfjöllun The Athletic.

Manchester United er með 17 stig í sjötta sæti ensku úrvalsdeildarinnar, níu stigum minna en topplið Chelsea, en liðið hefur unnið einn af síðustu sex deildarleikjum sínum og tapað fjórum þeirra.

• Blogga um frétt