Frá út tímabilið?

Angelo Ogbonna, varnarmaður enska knattspyrnufélagsins West Ham, gæti misst af restinni af tímabilinu vegna meiðsla. Það er Sky Sports sem greinir frá þessu.

Ogbonna, sem er 33 ára gamall, meiddist á hné í leik West Ham og Liverpool í ensku úrvalsdeildinni á sunnudaginn í London en leiknum lauk með 3:2-sigri West Ham.

Leikmaðurinn er með sködduð liðbönd í hné og gæti þurft að gangast undir aðgerð vegna meiðslanna.

West Ham hefur ekki sett neinn tímaramma á endurkomu Ogbonna en það gæti vel farið svo að hann spili ekki meira á leiktíðinni að því er fram kemur í frétt Sky Sports um málið.

West Ham hefur byrjað tímabilið af miklum krafti og er sem stendur í þriðja sæti ensku úrvalsdeildarinnar með 23 stig, þremur stigum minna ne topplið Chelsea.

• Blogga um frétt