Íhuga að rifta samningi Ramsey

Forráðamenn ítalska knattspyrnufélagsins Juventus vilja ólmir losna við Aaron Ramsey, miðjumann liðsins. Það er Goal sem greinir frá þessu.

Ramsey, sem er þrítugur, gekk til liðs við Juventus á frjálsri sölu frá Arsenal sumarið 2019 en hefur engan vegin staðið undir þeim væntingum sem gerðar voru til hans.

Miðjumaðurinn hefur aðeins komið við sögu í fimm leikjum með Juventus á tímabilinu en hann á að baki 70 leiki fyrir félagið í öllum keppnum þar sem hann hefur skorað sex mörk.

Ramsey hefur verið orðaður við bæði Newcastle og Everton að undanförnu en félagið gæti rift samningi hans í janúar, ef þeim tekst ekki að selja hann þegar glugginn verður opnaður.

Velski landsliðsmaðurinn þénar í kringum 200.000 pund á viku á Ítalíu og er það stærsta ástæða þess að Juventus vill losna við hann sem fyrst.

• Blogga um frétt