Leeds endurheimtir lykilmenn

Enska knattspyrnufélagið Leeds United mun endurheimta tvo lykilmanna sinna, brasilíska vængmanninn Raphinha og spænska sóknarmanninn Rodrigo, fyrir leik liðsins á útivelli gegn Brighton & Hove Albion í ensku úrvalsdeildinni í dag.

Raphinha missti af síðasta leik, 1:2-tapi gegn Tottenham Hotspur, vegna veikinda og Rodrigo var þá að glíma við meiðsli.

Leikmannahópur Leeds er með þeim smæstu í deildinni og því stór skörð sem þarf að fylla þegar lykilmenn meiðast.

Endurkoma tvímenninganna er því kærkomin fyrir liðið, sem hefur átt í erfiðleikum á tímabilinu og er rétt fyrir ofan fallsæti.

Fyrirliðinn Luke Ayling, Patrick Bamford og Robin Koch eru ennþá meiddir en Ayling nálgast þó endurkomu.

Leikur Brighton og Leeds hefst klukkan 17:30 í dag.

• Blogga um frétt