Á förum frá Liverpool í janúar?

Nathaniel Phillips gæti yfirgefið enska knattspyrnufélagið Liverpool þegar janúarglugginn verður opnaður. Það er Telegraph sem greinir frá þessu.

Phillips, sem er 24 ára gamall, hefur aðeins komið við sögu í tveimur leikjum með Liverpool á tímabilinu og í báðum leikjum kom hann inn á sem varamaður.

Hann hefur ekkert leikið með liðinu í ensku úrvalsdeildinni það sem af er leiktíðar en hann er á eftir þeim Virgil van Dijk, Joel Matip, Ibrahima Konáte og Joe Gomez í goggunarröðinni á Anfield.

Telegraph greinir frá því að mörg lið hafi áhuga á Phillips en þar ber hæst að nefna Newcastle og West Ham. Þá hefur hann einnig verið orðaður við Burnley, Brighton og Southampton.

Phillips var í lykilhlutverki með Liverpool á síðustu leiktíð og lék 17 leiki í ensku úrvalsdeildinni þar sem hann skoraði eitt mark.

Liverpool er sagt tilbúið að selja leikmanninn fyrir 15 milljónir punda en hann er samningsbundinn félaginu til sumarsins 2025.

• Blogga um frétt