Konsa hetja Villa gegn Leicester

Aston Villa vann sterkan 2:1 endurkomusigur á Leicester City þegar liðin mættust í 15. umferð ensku úrvalsdeildarinnar í knattspyrnu karla í dag. Leicester náði forystunni en miðvörðurinn Ezri Konsa svaraði með tveimur mörkum fyrir Villa.

Harvey Barnes kom gestunum yfir á 14. mínútu. Hann fékk þá sending frá Patson Daka, lék með boltann inn í vítateig og lagði hann snyrtilega á milli fóta Konsa, þaðan sem boltinn rataði í bláhornið fjær.

Aðeins þremur mínútum síðar jafnaði Villa metin. Douglas Luiz sendi boltann á fjærstöngina úr aukaspyrnu, Matty Cash skallaði boltann þvert fyrir þar sem Emiliano Buendía skallaði að marki áður en títtnefndur Konsa stökk til og stýrði boltanum í netið af stuttu færi.

Jacob Ramsey virtist vera að koma Villa yfir skömmu fyrir leikhlé en MichaeL Oliver dómari dæmdi markið af eftir að hafa skoðað það í VAR. Þótti honum sem Ramsey hafi sparkað boltann úr höndum Kasper Schmeichel, sem var með aðra höndina ofan á boltanum, þegar hann skoraði.

Staðan var því jöfn, 1:1, í hálfleik.

Snemma í síðari hálfleik, á 54. mínútu, skoraði Konsa annað mark sitt. Það gerði hann með skalla af stuttu færi á fjærstönginni eftir hornspyrnu John McGinn frá hægri.

Leikmenn Leicester reyndu hvað þeir gátu til þess að jafna metin en Villa hélt og vann að lokum góðan eins marks sigur.

• Blogga um frétt