Portúgalinn með hæstu sigurprósentuna

Portúgalski miðjumaðurinn Bernardo Silva hefur leikið frábærlega með Englandsmeisturum Manchester City á tímabilinu og virðist sem liðinu sé ómögulegt að gera eitthvað annað en að vinna leiki þegar hann er á vellinum.

Það er enda nærri lagi þar sem Silva státar sig af bestu sigurprósentu í sögu ensku úrvalsdeildarinnar þegar leikmenn sem hafa leikið fleiri en 100 leiki eru taldir með.

Silva hefur unnið rétt tæplega 77 prósent af þeim 146 leikjum sem hann hefur spilað í deildinni, eða 112 leiki.

Hefur hann enda unnið ensku úrvalsdeildina á þremur af þeim fjóru heilu tímabilum sem hann hefur leikið með liðinu og freistar þess að vinna sinn fjórða titil á fimm tímabilum á yfirstandandi tímabili.

• Blogga um frétt