United sigraði Burnley þægilega

Manchester United sigraði Burnley 3:1 á Old Trafford í Manchester í ensku úrvalsdeildinni í knattspyrnu í kvöld. 

Heimamenn voru talsvert sterkari aðilinn í fyrri hálfleiknum og komust yfir strax á áttundu mínútu. Cristiano Ronaldo ætlaði þá að taka við boltanum í teignum eftir sendingu frá Mason Greenwood en virtist leggja hann alveg óvart fyrir Scott McTominay sem kom á ferðinni. Skotinn kláraði mjög vel í fyrstu snertingu í nær hornið. Tæplega 20 mínútum síðar tvöfaldaði svo Jadon Sancho svo forystu United. Hann komst þá inn á teiginn vinstra megin, fór á hægri fótinn og laumaði boltanum niðri í fjærhornið. Skotið hafði smávægilega snertingu af Ben Mee og verður mögulega skráð sem sjálfsmark síðar meir.

Ronaldo skoraði þriðja mark United. AFP

Þriðja mark United kom svo á 35. mínútu. Sancho lagði boltann þá á McTominay sem hamraði boltanum í átt að marki. Wayne Hennessey markvörður Burnley gerði vel og varði skotið í stöngina en ekki vildi betur til en svo að boltinn datt beint fyrir fætur Cristiano Ronaldo sem skoraði eitt auðveldasta mark ferils síns í opið mark frá markteigslínu. Einungis þremur mínútum síðar minnkuðu gestirnir þó muninn þvert gegn gangi leiksins. Eric Bailly átti þá slaka hreinsun beint á Aaron Lennon sem fékk að hlaupa með boltann alveg óáreittur inn á teig United og klára í hornið. Frábærlega gert en varnarleikurinn vægast sagt skrýtinn. Staðan í hálfleik var því 3:1, heimamönnum í vil.

Aaron Lennon minnkar muninn. AFP

Seinni hálfleikurinn var mjög langt frá því að vera jafn þeim fyrri hvað skemmtanagildi varðar. Lítið sem ekkert markvert gerðist og heimamenn sigldu þægilegum 3:1 sigri heim án mikillar mótspyrnu.

Með sigrinum fer United upp að hlið West Ham í fimmta sæti deildarinnar. Burnley sitja áfram í 18. sæti og þurfa að fara að ná í fleiri stig ætli þeir sér ekki að falla í vor.

Man. Utd	3:1	Burnley	Opna lýsingu Loka
90. mín. Cristiano Ronaldo (Man. Utd) á skot framhjá Kemst í ágætis fyrirgjafastöðu og reynir að finna Cavani, en sendingin fer af varnarmanni og aftur á Ronaldo. Þá tekur hann boltann í fyrsta á lofti og reynir skot úr mjög þröngri stöðu, en það fer framhjá nærstönginni.
Augnablik — sæki gögn...

• Blogga um frétt