Tottenham að fá leikmann Juventus

Enska knattspyrnufélagið Tottenham hefur komist að samkomulagi við Juventus um að sænski landsliðsmaðurinn Dejan Kulusevski leiki með Lundúnafélaginu út tímabilið að láni. Tottenham er með forkaupsrétt á Kulusevski eftir tímabilið. 

Kulusevski fer í læknisskoðun hjá Tottenham í dag og verður fyrsti leikmaðurinn sem félagið fær í félagaskiptaglugganum.

Sænski leikmaðurinn hefur leikið 27 leiki með Juventus á leiktíðinni og skorað tvö mörk. Hann hefur hinsvegar aðeins sjö sinnum verið í byrjunarliði.

Juventus greiddi Atalanta 45 milljónir evra fyrir Kulusevski í janúar árið 2020 en hann hefur ekki náð að festa sig í sessi hjá ítalska stórliðinu. Í 20 landsleikjum með Svíum hefur Kulusevski skorað eitt mark. 

• Blogga um frétt