Rooney rannsakaður: Skildi takka eftir í fæti Terry

Enska knattspyrnusambandið hefur sett sig í samband við Wayne Rooney, knattspyrnustjóra Derby County, vegna ummæla hans í viðtali þar sem hann rifjaði upp leik með Manchester United fyrir sextán árum.

Rooney sagði þá frá leik gegn Chelsea árið 2006 þar sem hann viðurkenndi að hafa skipt um takka undir skónum, notað þá lengstu sem leyfilegir voru til þess að meiða einhvern leikmanna Chelsea.

„Við vissum að ef Chelsea ynni leikinn yrðu þeir Englandsmeistarar. Allan minn feril, fram til síðasta leiks með Derby, notaði ég alltaf gamaldags plasttakka með málmi á endanum. Fyrir þennan leik skipti ég hinsvegar yfir í stóra og langa málmtakka, lengstu leyfilega lengd, því ég var ákveðinn í að meiða einhvern," sagði Rooney í viðtalinu.

„Ég vissi að þeir myndu vinna leikinn. Þeir voru betra liðið á þessum tíma svo ég skipti um takka. Þeir voru löglegir en ég var ákveðinn í því að ef ég færi í tæklingu á annað borð myndi ég láta finna fyrir  mér. Og það gerði ég. John Terry fór heim á hækjum eftir leikinn. Ég gerði stóra holu í fótinn á honum, og svo áritaði ég treyjuna mína handa honum eftir leikinn.

Nokkrum vikum síðar sendi ég honum treyjuna og bað hann um að senda mér takkann minn. Ef þið skoðið myndskeið frá þessu sjáið þið JT á hækjum þegar þeir fagna sigrinum," sagði Rooney í viðtalinu.

Terry brást við þessu með fullt af brosköllum á Twitter: „Ertu að tala um leikinn þegar þú skildir takkann eftir í fætinum á mér?"

• Blogga um frétt