Féllum allir fyrir Núnez í þessum tveimur leikjum

Jür­gen Klopp, knatt­spyrn­u­stjóri Li­verpool, seg­ir að all­ir hjá fé­lag­inu hafi orðið hug­fangn­ir af úr­úg­væska fram­herj­an­um Darw­in Núnez þegar Li­verpool og Ben­fica mætt­ust í 8-liða úr­slit­um Meist­ara­deild­ar Evr­ópu á síðasta tíma­bili.

Núnez skoraði fyr­ir Ben­fica í báðum leikj­un­um þar sem Li­verpool vann að end­ingu 6:4 sam­an­lagt og komst áfram í undanúr­slit.

Í sum­ar var hann svo keypt­ur á 64 millj­ón­ir punda, sem gæti þó hækkað upp í 85 millj­ón­ir punda með ýms­um ár­ang­ur­s­tengd­um greiðslum.

„Það var ekki ljóst hvort hann gæti spilað fyrri leik­inn því hann var ný­kom­inn úr landsliðsverk­efni. Það var al­veg ljóst að hann væri mjög góður.

En þegar maður sér hann með eig­in aug­um er það mjög til­komu­mikið. Kraft­ur­inn í bland við tækn­ina, vilj­ann, sniðugar hreyf­ing­ar og vand­ræðin sem hann kom okk­ur í,“ sagði Klopp í sam­tali við heimasíðu Li­verpool.

„Við urðum all­ir ást­fangn­ir af hon­um í þess­um tveim­ur leikj­um. Mjög ágeng­ur Suður-Am­er­íku­búi, það er mjög góðs viti!

Við nut­um þess mjög að horfa á hann og þegar það kom í ljós að við átt­um góða mögu­leika á að kaupa hann þá lögðum við allt kapp á það og erum ein­stak­lega ánægðir með að hann sé hér núna,“ bætti hann við.

• Blogga um frétt