Enska knattspyrnufélagið Everton hefur samþykkt 40 milljóna punda kauptilboð Newcastle United í enska vængmanninn Anthony Gordon.
Kaupverðið gæti hækkað upp í 45 milljónir punda með ýmsum ákvæðum.
Gordon vill ólmur yfirgefa uppeldisfélag sitt Everton og hefur í því skyni neitað að æfa með liðinu. Sky Sports greinir frá því að hann hafi misst af þremur æfingum hjá Everton í vikunni.
Í morgun ítrekaði Gordon ósk sína um að yfirgefa félagið strax í janúarglugganum og mun hann nú ræða við Newcastle um kaup og kjör.
Er búist við því að skiptin gangi í gegn um helgina.