Þarf að gæta sín að verða ekki latur

Erik ten Hag, knattspyrnustjóri Manchester United, segir að Marcus Rashford megi ekki slaka á, vilji hann halda frábæru leikformi sínu við.

Rashford hefur skorað 21 mark í 34 leikjum í öllum keppnum á yfirstandandi tímabili og er þannig aðeins einu marki frá sínu besta tímabili hvað markaskorun varðar, en hann skoraði 22 mörk í 44 leikjum tímabilið 2019/2020.

„Ég veit ekki hvenær þetta hættir en ef þú ert sáttur þá hættir það og þar sem ánægja leiðir til leti verður maður að halda sér við á hverjum degi.

Með því að halda sér við og halda einbeitingu í hverjum leik, þar sem hann kemur með orku og trú, mun hann halda áfram að skora,“ sagði ten Hag á blaðamannafundi í gær.

Rashford skoraði annað marka Man. United í 2:0-sigri á Leeds United í ensku úrvalsdeildinni í gær.

• Blogga um frétt