Íþróttir | Enski boltinn | mbl | 2.3.2023 | 10:29 | Uppfært 12:22

„Fannst þetta ekki vera aukaspyrna“

Diogo Jota og Max Kilman eigast við í leiknum í gærkvöldi. AFP/Paul Ellis

Jürgen Klopp, knattspyrnustjóri Liverpool, var ánægður með 2:0-sigur liðsins á Wolverhampton Wanderers í ensku úrvalsdeildinni í gærkvöldi en skildi þó lítið í því að mark sem Darwin Núnez skoraði hafi verið dæmt af.

Núnez virtist vera að koma Liverpool í forystu á 65. mínútu en eftir að hafa ráðfært sig við VAR-skjáinn ákvað Paul Tierney dómari leiksins að dæma markið af vegna brots í aðdragandanum.

„Ég sá þetta eftir leikinn og mér fannst þetta ekki vera aukaspyrna. Það er hægt að dæma öll atvik í hægri endursýningu en viðbrögð okkar í kjölfarið voru mikilvæg,“ sagði Klopp í samtali við BBC eftir leikinn.

Brot var dæmt á Diogo Jota og fékk mark Núnez því ekki að standa.

Nokkrum mínútum síðar, á 73. mínútu, skoraði hins vegar Virgil van Dijk og Mohamed Salah innsiglaði svo sigurinn fjórum mínútum eftir það.

„Við lékum vel í fyrri hálfleik en byrjuðum illa í þeim síðari. Við litum aðeins stöðugri út og því viljum við halda áfram.

Við börðumst fyrir því að skora þetta fyrsta mark og annað markið var frábært,“ bætti Klopp við.