Íþróttir | Enski boltinn | mbl | 4.3.2023 | 17:10

Langþráður sigur Chelsea – Úlfarnir lögðu Tottenham

Ben Chilwell og Wesley Fofana fagna sigurmarki þess síðarnefnda í dag. AFP/Justin Tallis

Chelsea vann afar langþráðan og kærkominn sigur á Leeds United þegar liðin áttust við í ensku úrvalsdeildinni í knattspyrnu karla í dag. Á sama tíma vann Wolverhampton Wanderers góðan sigur á Tottenham Hotspur.

Wesley Fofana reyndist hetja Chelsea þegar hann skoraði sigurmarkið í 1:0-sigri á Leeds snemma í síðari hálfleik.

Hann skoraði þá með skalla eftir hornspyrnu Bens Chilwells.

Var þetta fyrsti sigur Chelsea í deildinni frá 15. janúar.

Úlfarnir fengu Tottenham í heimsókn og unnu einnig sterkan 1:0-sigur.

Adama Traoré skoraði sigurmark heimamann átta mínútum fyrir leikslok.

Aston Villa vann sömuleiðis Crystal Palace með minnsta mun, 1:0.

Wilfried Zaha virtist vera að koma gestunum í Crystal Palace í forystu eftir aðeins fimm mínútna leik. VAR skarst hins vegar í leikinn og fékk markið ekki að standa eftir að rangstaða var dæmd.

Eftir tæplega hálftíma leik kom annar Palace-maður, Joachim Andersen, boltanum í netið en illu heilli fyrir hann í sitt eigið net. Reyndist það sigurmarkið.

Brighton vann öruggan 4:0-sigur á West Ham United.

Argentínski heimsmeistarinn Alexis Mac Allister kom Brighton í forystu á 18. mínútu með marki úr vítaspyrnu sem var dæmd eftir að Jarrod Bowen hrinti Kaoru Mitoma innan vítateigs.

Staðan orðin 1:0 og þannig stóðu leikar í leikhléi.

Í síðari hálfleik keyrðu heimamenn yfir Hamrana og bættu við þremur mörkum.

Þau skoruðu Joel Veltman, Kaoru Mitoma og Danny Welbeck.