Hættir ef þau losa sig við hann

Ian Wright, sérfræðingur í Match of the Day á BBC og fyrrverandi leikmaður enska knattspyrnuliðsins Arsenal, gagnrýndi ákvörðun stöðvarinnar að senda Gary Lineker, stjórnanda þáttarins í leyfi, harðlega í hlaðvarpi sínu, Wrighty's House.

Wright sýndi Lineker stuðning og var snöggur að gefa það út að hann ætlaði sér ekki að mæta í þáttinn fyrr en mál hans væru leyst. Aðrir sérfræðingar þáttarins gerðu svo slíkt hið sama og nú hefur BBC gefið út að þátturinn muni fara í loftið án stjórnanda og sérfræðinga.

Wright tjáði sig enn frekar um málið í hlaðvarpinu í morgun.

„Ef þau losa sig við Gary Lineker hætti ég líka. Ég fer, það er ekki möguleiki að ég verði áfram. Hann á að geta sagt það sem honum finnst í sínum eigin þætti.“

Lineker var sendur í leyfi fyrir brot á reglum stöðvarinnar en hann gagnrýndi bresk stjórnvöld fyrir stefnu sína í málefni flóttafólks. Wright segist vera sammála Lineker.

„Þetta fólk hefur enga samúð. Það eru alltaf þau sem minnst mega sín sem þjást. Það sem að Lineker sagði er hárrétt.“

• Blogga um frétt