United ekki í erfiðleikum með Everton

Manchester United vann Everton, 2:0, í ensku úrvalsdeild karla í fótbolta á Old Trafford í dag. 

Fyrri hálfleikurinn var í algjörri eign Manchester-liðsins sem fékk ótalmörg færi. Leikmenn United komust sífellt inn fyrir vörn Everton og var ótrúlegt hversu mörgum færum heimamenn klúðruðu. 

Það kom þó ekki að sök því á 36. mínútu þræddi Jadon Sancho skoska miðjumanninn Scott McTominay í gegn og hann hamraði boltann á nærstöngina framhjá Jordan Pickford, markverði Everton, 1:0, sem voru hálfleikstölur. 

Seinni hálfleikurinn var mun rólegri en United hafði tök á leiknum allan tímann. Á 71. mínútu tvöfaldaði svo varamaðurinn Anthony Martial forystuna fyrir United eftir afleit mistök hjá Seamus Coleman. 

Rashford vann boltann af Íranum sem missti hann undir sig og renndi honum á Martial sem setti boltann framhjá Pickford í markinu, 2:0, og úrslitin gott sem ráðin. 

Christian Eriksen kom svo inná í liði Manchester United en hann hefur ekki spilað síðan í lok janúar vegna meiðsla. Slæmu fréttirnar eru hinsvegar þær að Marcus Rashford haltraði af velli og gæti verið meiddur í einhvern tíma. 

United er nú með 56 stig í þriðja sæti deildarinnar en Everton er með 27 í því 16. 

Man. Utd	2:0	Everton	Opna lýsingu Loka
90. mín. Man. Utd fær hornspyrnu
Augnablik — sæki gögn...

• Blogga um frétt