Gæti yfirgefið United

Enski landsliðsmaðurinn Harry Maguire gæti yfirgefið enska úrvalsdeildarfélagið Manchester United, þar sem hann fær lítið að spreyta sig með liðinu.

Daily Mail greinir frá að Maguire sé orðinn þreyttur á bekkjarsetu hjá United og vilji færa sig um set til að eiga meiri möguleika á að halda sæti sínu í byrjunarliði enska landsliðsins.

Maguire hefur aðeins fimm sinnum verið í byrjunarliði United í ensku úrvalsdeildinni eftir 0:4-tap liðsins gegn Brentford í ágúst. Erik ten Hag, knattspyrnustjóri United, hefur m.a. frekar spilað bakverðinum Luke Shaw í miðverðinum.

Þrátt fyrir það hefur Maguire enn verið í lykilhlutverki hjá enska landsliðinu, en ofangreindur miðill segir Maguire vera áhyggjufullan að missa landsliðssætið, verði hann áfram í algjöru aukahlutverki hjá Manchester-liðinu.

• Blogga um frétt