Arsenal hélt meistaravonum sínum á lífi

Arsenal minnkaði forskot Manchester City í eitt stig á toppi ensku úrvalsdeildarinnar í knattspyrnu með afar mikilvægum sigri gegn Newcastle á St. James‘ Park í Newcastle í dag.

Martin Ödegaard kom Arsenal yfir strax á 14. mínútu með frábæru skoti af 30 metra færi.

Arsenal fékk aukaspyrnu, úti vinstri megin, og þeim gekk erfiðlega að koma boltanum fyrir markið.

Sóknin virtist því vera að renna út í sandinn þegar boltinn barst til Ödegaard sem lét vaða á markið og boltinn fór á milli fóta varnarmanna Newcastle og söng svo í bláhorninu.

Bæði lið fengu fjölda tækifæri til þess að bæta við mörkum í fyrri hálfleik en Nick Pope í marki Newcastle og Aaron Ramsdale í marki Arsenal voru báðir vandanum vaxnir í markinu.

Arsenal byrjaði svo síðari hálfleikinn af miklum krafti og þeir uppskáru loksins á 71. mínútu eftir vel útfærða skyndisókn.

Martinelli fór illa með Dan Burn, varnarmann Newcastle, og átti svo fasta fyrirgjöf í teignum. Boltinn fór í tána á Fabian Schär og þaðan í netið og lokatölur því 2:0 í Newcastle.

Arsenal er nú með 81 stig í öðru sæti deildarinnar, stigi minna en Manchester City sem á leik til góða á Arsenal, en Newcastle er með 65 stig í þriðja sætinu.

Newcastle	0:2	Arsenal	Opna lýsingu Loka
90. mín. Fabian Schär (Newcastle) á skot framhjá Schär með skotið, utan teigs, en boltinn rétt yfir markið.
Augnablik — sæki gögn...

• Blogga um frétt